पुस्तक समीक्षा : छत्तीसगढ़ी समाज के स्वाभिमान जगाये के एक उदीम " हीरा छत्तीसगढ़ "

    पुस्तक समीक्षा
    • पुस्तक के नाव - हीरा छत्तीसगढ़
    • लेखक - जागेश्वर प्रसाद
    • समीक्षक - जयंत साहू
    • मिले के ठउर - छत्तीसगढ़ी भवन, हांडीपारा, रायपुर

    छत्तीसगढ़ी समाज के स्वाभिमान जगाये के एक उदीम : हीरा छत्तीसगढ़

    जागेश्वर प्रसाद के निबंध पोथी ‘हीरा छत्तीसगढ़’ छत्तीसगढ़ी समाज के स्वाभिमान जगाये के एक जबर उदीम आए। येमा 23 ठी लेख ल समोखे गे हाबे। सबो लेख छत्तीसगढ़ी भासा म हावय जेला पढ़त तन-मन म सोसित छत्तीसगढि़या समाज बर अगाध पीरा उमड़थे। छत्तीसगढि़या मनके अस्मिता अउ स्वाभिमान खातिर छत्तीसगढ़ महतारी के एक हीरा सहिक बेटा जागेश्वर प्रसाद पाछु 55 साल ले मसाल ऊंचाये हावय। उंकरे सहिक पुरखा मनके तियाग, तपस्या अउ समरपन ले आज छत्तीसगढ़ म नवा बिहान आए हावय।

    ‘हीरा छत्तीसगढ़’ म तइहा के कतकोन पय ल पाठक मनके बीच राखे गे हाबे। जेमा पहिली लेख हमार हीरा-छत्तीसगढ़ म लेखक ह मानव जनम ल अनमोल बतावत लिखथे के– ‘जउन छत्तीसगढ़ के माटी अउ संस्कृति म रच-पच जाथे ओहर जरूर हीरा के गुन ल पा जाथे। अऊ जउन छत्तीसगढ़, छत्तीसगढ़ी अउ छत्तीसगढि़या संग दोगलई करथे, भेदभाव रखथे ओहर पथरा बनके पथरा जाथे हीरा नइ बन पावय’। ओमन दिसंबर म जनम धरइया छत्तीसगढ़ के हीरा म संत गुरू घासीदास, जमींदार गोविंद सिंह, पं. सुंदरलाल शर्मा, ठाकुर प्यारेलाल सिंह, धनश्याम सिंह गुप्त, कंगला मांझी, राजा रामानुज सिंहदेव, पं. जगदीश प्रसाद तिवारी, जयनारायण पांडेय संग रविशंकर शुक्ल, पदुमलाल पुन्नालाल बख्शी, चंद्रिका प्रसाद पाण्डेय, हरि ठाकुर जी ल सुरता करे हावय। 

    इही रकम ले माटी पूत के लच्छन, छत्तीसगढि़या-गैर छत्तीसगढि़या के बीच लछमन रेखा, छत्तीसगढ़ी के दसा अउ दिसा, छत्तीसगढ़ी पत्रकारिता के बिकास यातरा, करजा ले मुक्त होना, छत्तीसगढ़ी समाज के पीछड़ापन के कारन अउ उपाय लेख म लेखक ह बहुत गंभीरता ले किथे के ‘जउन वर्ग या परिवार हीन भावना ले ऊपर उठके सिक्छा अउ संस्कार ल बदले के उदीम करथे ओही परिवार (समाज) ह आरथिक, सांस्कृतिक अउ राजनैतिक क्षेत्र म तरक्की घलो करिस’। आगू ओमन सहकारिता के जननी : छेरछेरा पुन्नी, पोरा-तीजा परब, घानी के बइला, सत संग, जीवन के असली जातरा- आठ कोसी जातरा जइसन लेख म मनखे ल दुनिया म अवतरे के कर्मकांड अउ मोक्ष कोति लेगे के रसता देखाये हावय। ओमन किथे के ‘ जउन जातरा ले जीवन-मरन के भंवर ले छुटकारा मिलथे। ओ जातरा ह अंदरमुखी, आध्यात्मिक होथे, येही जातरा ले मानव अपन परम लक्ष्य, परम शांति अउ परमानंद ल हासिल करथे। 

    जागेश्वर प्रसाद ल छत्तीसगढ़ी पत्रकारिता के पुरोधा कहे जाथे ओमन 1965 म प्रदेश के पहिली छत्तीसगढ़ी पत्रिका ‘छत्तीसगढ़ी सेवक’ के संपादन करिस। नवा लिखइया मनला एक मंच देके संगे-संग ओमन ल छत्तीसगढ़, छत्तीसगढ़ी अउ छत्तीसगढि़या वाद के भावना ल जन-जन म बगराये के अभियान चलाइस। अऊ ये निबंध पोथी ‘हीरा छत्तीसगढ़’ म उही बखत के लिखे 22 ठी आलेख ल 88 पेज के पुस्तक के रूप म संग्रहित करके वैभव प्रकाशन के माध्यम ले पाठक तक पहुंचाये हाबे। ये किताब छत्तीसगढ़ के मूल निवासी मनके सामाजिक, आरथिक अउ राजनैतिक दसा-दिसा ऊपर चिंतन करइया बर घातेच उपयोगी हावय। 0 
    jayant sahu


    वरिष्ठ साहित्यकार आचार्य डॉ. दशरथ लाल निषाद ‘विद्रोही’ जी के व्यक्तित्व अउ कृतित्व‍ उपर जयंत साहू के विशेष लेख-


    दू कोरी ले आगर शोधपरक साहित्य के रचयिता : दशरथ लाल निषाद

    छत्तीसगढ़ के गवई गांव म रहन-सहन, खान-पान, नता-रिस्ता, पहनावा, सिंगार अउ बोली-भाखा के अलगेच महत्ता हावय। हम देखथन, सुनथन, महसूस करथन फेर ओला लिखे के बारे म सोचथन तव बिसय ह छोटकून लागथे। ये डहर काकरो धियाने नइ जाए। अऊ जेन कोति काकरो धियान नइ जावे उही म दशरथ बबा के जबर कलम चलथे। गवई गांव के लोक जीवन ल उजागर करत उं‍कर अब तक दू कोरी किताब छपगे हाबे, अऊ अतकेच कन पांडुलिपि छपे के अगोरा म हावय। दशरथ बबा ह छत्तीसगढ़ के पहिली अइसे साहित्यकार आए जेमन ग्राम्य जनजीवन ल रेखांकित करत सबले जादा किताब लिखे हावय, जइसे- छत्तीसगढ़ी सतसई, छत्तीसगढ़ के भाजी, छत्तीसगढ़ के कांदा, छत्तीसगढ़ के गांधी, छत्तीसगढ़ के पान, छत्तीसगढ़ के भक्तिन, छत्तीसगढ़ के बासी, छत्तीसगढ़ के मितानी, छत्तीसगढ़ के रोटी, छत्तीसगढ़ के फूल, छत्तीसगढ़ के मछरी-मास, छत्तीसगढ़ के चटनी, अऊ गजब अकन। दशरथ बबा के बारे म ये कहना गलत नइ होही के यदि आप डॉ. दशरथ लाल निषाद अऊ उंकर कृति ल जानथो तब तो आप छत्तीसगढ़ ल जानथो, छत्तीसगढ़ के साहित्य-कला-संस्कृति ल जानथव।   
    83 बछर के सियानी उमर म आज ओमन के शरीर जवाब देदे हावय, हांथ-गोड़ नी चले। तभो ले जिपरहा साहित्यकार दशरथ बबा ह अपन खटिया म कंप्यूटर वाला ल बइठा के नवा किताब के सिरजन म लगे हावय। शरीर भले थक गे हावय, फेर मन अउ आत्मा आज भी चेम्मर हावय माटी के लाल के। मगरलोड जिला धमतरी के दुरलवा आचार्य डॉ. दशरथ लाल निषाद ‘विद्रोही’ एक मध्यम किसान परिवार के गुनिक बेटा आए। संगम साहित्य समिति के माई मुड़ी। उंकर जनम तेंदूभाठा म 20 नवंबर 1938 के होइस। महानदी अउ पइरी के कोरा म बसे मगरलोड उंकर कर्मभूमि बनिस। पाख बरोबर अंधियारी अउ अंजोरी के दिन ल तापत अपन मेहनत के दम म दशरथ बबा ह बनि-भूति के संग पढ़ई तको करते रिहिन। हिन्दी साहित्य रत्न के परीक्षा पास करके 'आचार्य' के मानद उपाधि पाइन, अऊ ओ समे म ‘आयुर्वेद विशारद’ के परीक्षा म तको सफल होइन। ओमन अखबारी प्रचार अउ सोशल मीडिया ले कोसो दूरिहा, आंचलिक साहित्यकार अउ एक अनुभवी आयुर्वेद चिकित्सक के रूप म अंचल म जाने जाथे। 

    दशरथ बबा के आज जतके उमर होहे ओतके अकन ओमन सम्मान तको पा डरे हावय जेमा नागपुर, इलाहाबाद, इंदौर, हरियाणा, बिजनौर, हैदराबाद, पानीपत, गाजियाबाद, गुना, तलेन, हिमांचल प्रदेश, खंडवा, राजगढ़ अउ बैतूल जइसन शहर के बड़का संस्था कोति ले उनला सम्मानोपाधि मिले हावय अउ स्थानीय स्तर म सम्मानित होइन तेन अलग। हिन्दी म ओमन देशभर के आन-आन पत्रिका म गजब छपे हावय। फेर उंकर ठोस कृति छत्तीसगढ़ी म दिखथे जेहा किताब के संग छत्तीसगढ़ी के पहिली पत्रिका छत्तीसगढ़ी से‍वक, मयारू माटी, बरछाबारी, अंजोर, अऊ दैनिक समाचार पत्र के विशेषांक म प्रमुखता ले छपे हावय। दशरथ बबा ह साहित्य सिरजन भर नइ करत रिहिसे बल्कि अलग छत्तीसगढ़ राज्य आंदोलन म तको जबर योगदान दे हावय।

    दशरथ बबा के लेखन के जबर विशेषता आए के ओमन शोधपरक तथ्य लिखथे, चिंतन-मनन के बाद ओला कृति के रूप देथे। अब उंकर ‘छत्तीसगढ़ के कांदा’ किताब म देखव 41 प्रकार के कांदा के उल्लेख हावय- जिमी कांदा, कलिहारी कांदा, गुलाल कांदा, केंवट कांदा, ढुलेना कांदा, डांग कांदा, करू कांदा, जग मंडल कांदा, बनराकस कांदा, बरकान्दा, केशरुआ कांदा। अइसने ‘छत्तीसगढ़ के भाजी’ किताब म- गूमी भाजी, कोलियारी भाजी, मकोइया भाजी, भेंगरा भाजी, सेम्भर भाजी मनके सुवाद अउ लाभ तको बताये गे हावय। ‘छत्तीसगढ़ के सिंगार’ किताब म 76 सवांगा के बरनन हावय जेमा गहना गुठा, गोदना अउ ओनहा पहिरे के विधी विधान ह लिखाये हाबे। 

    दशरथ बबा के पुस्तक 'छत्तीसगढ़ के बासी' म अमरित बासी, चटनी बासी, बोरे बासी, दही बासी, कोदो बासी, पेज बासी, बासी भात अऊ केउ किसम के बरनन उंकर विशेषता सहित हावय। ‘छत्तीसगढ़ के मितानी’ ह इहां के लोक जीवन म मानवता के मया के जबर परिभाषा रखथे- महाप्रसाद, भोजली, गंगाजल, जंवारा, गंगाबारू जइसन नता के बंधना के रीति अउ विधि ले आजीवन चले के सीख संग परम्परा ल संजोये के गियान आधुनिक साहित्य समाज ल देवत हाबे दशरथ बबा ह।

    अइसने अड़तालिस पेज के छोटकून ‘छत्तीसगढ़ के चटनी’ किताब ल पढ़े म पढ़ते-पढ़त जीभ ह चटकारा लेथे अउ मुँह ले लार चुचवा जथे। ये विशेषता आए आचार्य डॉ. दशरथ लाल निषाद 'विद्रोही' जी के लेखन शैली के जोन 15 बछर के उमर ले सुरू होके आज 83 साल तक सरलग चलते हावय। भगवान ओमन ल गजब अऊ लम्बा उमर देवय ताकि हमन अइसने उंकर कलम ले शोधपरक साहित्य पढ़त राहन। संगे-संग सरकार ले घलोक गेलौली हावय के ओमन के दीर्घकालीन साहित्य सेवा ल देखत सर्वोच्च सम्मानोपाधि ले अलंकृत करय।

    0 जयंत साहू, रायपुर 9826753304